Thursday, October 31, 2013

நடிகர் சிவகுமாரின் அறம்செய விரும்பு






சென்னை நுங்கம்பாக்கத்தில் உள்ள பிரிவியூ தியேட்டரான ஃபோர் ஃபிரேம்ஸ் வழக்கமாய் தயாரான படங்களைத் திரையிட்டுப் பார்க்கும் திரையுலகப் பிரமுகர்களால் மட்டுமே நிரம்பிவழியும். இப்போதெல்லாம் வருடத்திற்கு ஒருமுறை அந்தத் தியேட்டருக்கு இந்தியாவை வழிநடத்திச் செல்லும் முக்கியமான தமிழர்கள் வருகிறார்கள். சமூகத்தின் பலதுறைகளைச் சார்ந்தவர்களாக அவர்கள் இருக்கிறார்கள். ஐஏஎஸ் அதிகாரிகள், நீதிபதிகள், தொழிலதிபர்கள், டாக்டர்கள், இலக்கியவாதிகள், எழுத்தாளர்கள், பத்திரிகையாளர்கள், ஓவியர்கள், திரைத்துறையைச் சார்ந்தவர்கள் என்று வந்து குழுமுகிறார்கள். இவர்கள் அத்தனைப் பேரும் ஒரு மனிதரின் அழைப்பின்பேரில் வருகிறவர்கள்………………


அடுத்து சில நாட்களில் ஏதோ ஒரு பிரபல சேனலில் ஒளிபரப்பாகவிருக்கும் அந்த மனிதரின் ஒன்றரை மணி நேர பேச்சைப் பெரிய ஸ்கிரீனில் பார்க்கிறார்கள், கேட்கிறார்கள். அந்தப் பேச்சால் கவரப்பட்டு வியந்துபோய் அந்த மனிதரின் கைகளைப் பற்றிக் குலுக்குகிறார்கள். அடுத்த மூன்று நாட்களுக்கு அந்த மனிதரின் செல்போன் பிரமுகர்களின் தொடர்ச்சியான அழைப்புகளில் திக்குமுக்காடுகிறது. அவ்வளவு பேரும் தங்களின் கருத்துக்களைப் பாராட்டுக்களைக் குவிக்கிறார்கள். தங்கள் மனதிலுள்ளதை பேச்சின் மூலம் சொல்வதை விடவும் எழுத்துக்களாய் சொல்வதில் உள்ள சுதந்திரத்தை விரும்பும் பெரிய மனிதர்கள் தங்கள் கருத்துக்களைக் குறுஞ்செய்திகளாய் அனுப்பிக்கொண்டே இருக்கிறார்கள். குறுஞ்செய்திகளால் அவருடைய செல்போன் நிரம்பிவழிகிறது.

அந்த மனிதர் நடிகர் சிவகுமார்!
 
யார் யாரெல்லாம் வருகிறார்கள் என்று பார்த்தோமானால் ஆச்சரியமாயிருக்கிறது. அப்துல்கலாமின் செயலர் பொன்ராஜ் இதற்கென்றே டெல்லியிலிருந்து வருகிறார். ‘மேடம் இன்னைக்கு சீக்கிரமாகவே விட்டுட்டாங்க’ என்று சொல்லி தமிழக முதல்வரின் செயலாளர் சுடலைக்கண்ணன் ஐஏஎஸ் தமது துணைவியாருடன் வருகிறார். மரியாதைக்குரிய நீதியரசர் சந்துரு தமது குடும்பத்தாருடன் வருகிறார். இந்தியாவின் முன்னாள் தலைமைத் தேர்தல் கமிஷனர்கள் வருகிறார்கள். ராஜாராம் ஐஏஎஸ் வருகிறார், உலகின் பல்வேறு பல்கலைக் கழகங்களில் விசிட்டிங் பேராசிரியராக இருப்பவரும், உலகெங்கும் பல்வேறு ஆடிட்டர்களை உருவாக்கியவருமான பத்மஸ்ரீ மனோகர் சௌத்ரி வருகிறார். ஜவஹர்லால் நேருவிடம் பணிபுரிந்த ஐஏஎஸ் அதிகாரியான பி.எஸ்.ராகவன் வருகிறார்………………

தமிழகத்தின் புகழ்பெற்ற டாக்டர்களான டாக்டர் ராஜேந்திரன், டாக்டர் செங்கோட்டுவேல், டாக்டர் ஜே.வி ஆகியோர் வருகின்றனர். டாக்டர் கமலா செல்வராஜ் வழக்கமாய் வருபவர்.
தொழிலதிபர்கள் பழனி.ஜி.பெரியசாமி, தொழிலதிபரும் இலக்கியவாதியுமான இயகோவா சுப்பிரமணியம், சுமங்கலி சந்துரு, கோயம்புத்தூர் ராமலிங்கம், கேபிஎன் டிராவல்ஸ் அதிபர் ஆகியோர் கண்களில் படுகின்றனர்.

எஸ்பிமுத்துராமன், முக்தா சீனிவாசன் ஆகியோரைத் தொடர்ந்து பிரபஞ்சன், இந்துமதி, திருப்பூர் கிருஷ்ணன், பத்திரிகையாளர் மணா, பிரபல ஓவியர் மணியம் செல்வன், எழுத்தாளர் லாசராவின் குமாரர் கண்ணன், திஜரவின் மகள், சிலம்புச் செல்வர் ம.பொ.சி குடும்பத்தினர் ஆகியோர் ஒருவர் பின் ஒருவராக வந்துகொண்டே இருக்கின்றனர். ஆல்இந்தியா ரேடியோவைச் சேர்ந்த குமரி எஸ்.நீலகண்டன் வருகிறார். ஸ்டாலின் குணசேகரன் வருகிறார். ஈரோடு அபி வருகிறார். (குறித்து வைத்துக்கொள்ளுங்கள், இந்த இளைஞர் எதிர்கால இளைஞர்களின் நம்பிக்கை நட்சத்திரமாக வலம்வரப்போகிறவர்) இன்னமும் பலதுறையைச் சார்ந்தவர்களும் வந்த வண்ணம் உள்ளனர்.

ஏவிஎம் சரவணன், இறையன்பு, தமிழருவி மணியன் ஆகியோர் ஏற்கெனவே இந்தப் படக்காட்சியைப் பார்த்துவிட்டார்கள் என்ற தகவலும் கசிகிறது.
அடுத்து ஒரு சின்ன பரபரப்பு. வெள்ளை நிறத்துக்கு அடையாளமான ராம்ராஜ் காட்டன் நாகராஜ் வருகிறார். சிவகுமாரின் எல்லா முக்கிய பேச்சுக்களையும் பிரபல சேனல்களில் ஒளிபரப்பும் உரிமையைப் பெறுவதுடன் அவற்றை சிடிக்களாக்கி பல லட்சம் மக்களிடம் கொண்டுசேர்க்கும் அரிய பணியையும் செய்துவருபவர் நாகராஜ்.

இத்தனை பிரமுகர்களுடன் ஃபோர்ஃபிரேம்ஸ் தியேட்டர் நிரம்பி வழிகிறது. முன்னைக்கும் இப்போதைக்கும் ஒரு பெரிய வித்தியாசம். முன்பெல்லாம் பிரமுகர்கள் தனியராய்த்தான் வந்து செல்வார்கள். இப்போதெல்லாம் திருமதிகளுடனும் பிள்ளைகளுடனும் வருகிறார்கள். உட்கார இடமில்லாமல் எக்ஸ்ட்ரா நாற்காலிகள் போடப்படுகின்றன. எவ்வித முணுமுணுப்புமில்லாமல் அமர்ந்து கொள்கின்றனர் பிரமுகர்கள். 

படக்காட்சி ஆரம்பிக்கிறது. வழக்கமாய் இல்லாத சம்பிரதாயமாக இந்த முறை சிவகுமார் மைக் பிடித்தார். இரண்டொரு வார்த்தைகள் பேசினார். “நான் கடவுள் நம்பிக்கை உள்ளவன். ஆனால் கோவிலுக்குப் போகமாட்டேன். புராண இதிகாசங்கள் அறநெறி நூல்கள் சொல்லும் நல்ல கருத்துக்களில் ஈடுபாடு உள்ளவன். விவேகானந்தர் போன்ற மகான்கள் சொல்லியவற்றை மதிப்பவன். அந்த வகையில்தான் வேதாத்ரி மகரிஷி அவர்களையும் நான் பார்க்கிறேன். தவிர, எந்த சாமியாரையும் நான் பின்பற்றுகிறவன் அல்ல” என்று சுருக்கமாக முடித்துக்கொண்டார். ‘எந்த சாமியாரையும் நான் பின்பற்றுகிறவன் அல்ல’ என்ற வார்த்தைக்கு மட்டும் அழுத்தம் கொடுத்ததுபோல் தோன்றியது.

அவருடைய இந்த முன்னுரை இந்தப் பேச்சிற்கு வேண்டியிருந்தது என்பது புரிகிறது. தமது நீண்ட நெடிய நடிப்புலக வாழ்க்கைக்குப் பின்னர் அவராகவே தேர்ந்தெடுத்துக் கொண்டது இந்தப் ‘பேச்சாளர்’ என்ற முகம்.

தமிழ்ச் சமுதாயம் பேச்சுகளுக்கும் பேச்சாளர்களுக்கும் பெயர்போனது. அரசியல் பேச்சாளர், ஆன்மிகப் பேச்சாளர், இலக்கியப் பேச்சாளர், பட்டிமன்றப் பேச்சாளர் என்று நிறைய பேச்சாளர்கள் இருக்கிறார்கள். இவர்களில் எந்த வகையினரிலும் வராமல் தமக்கென்று ஒரு தனி அடையாளத்தை அவர் ஏற்படுத்த நினைக்கிறார். தமக்கென்று ஒரு பாதையை அவராகவே போட்டுக்கொள்கிறார். 

எந்த மேடைப் பேச்சுக்கும் சில கிளிஷேக்கள் உள்ளன. அவற்றில் மாட்டிக்கொள்ளக்கூடாது என்பதில் கவனமாக இருக்கிறார். சொல்ல நினைத்த விஷயங்களை புராணங்கள் இதிகாசங்கள் கலந்து சொல்கிறார். உதாரணங்களுக்கு அவர் வெளியில் அதிகமாகச் செல்ல வேண்டியதில்லை. அவருடைய வாழ்க்கை அனுபவங்களிலேயே அவருக்கு நிறைய சம்பவங்கள் இருக்கின்றன. நிறைய பெரிய மனிதர்களிடம் ஏற்பட்ட நெருங்கிய நட்பு அவருக்குப் பல கதைகளைச் சொல்லியிருக்கிறது. அந்தக் கதைகளை ரத்தமும் சதையுமாகத் தோண்டி எடுக்கிறார் -

தேவைப் பட்ட இடங்களில் அவற்றைத் தொகுத்துத் தருகிறார்!

போலித்தனங்களைக் களைந்த வாழ்க்கை எது, வாழ்க்கையில் கடைப்பிடிக்கவேண்டிய பண்பாட்டுக் கூறுகள் என்ன, குடும்பம் என்றால் என்ன, சமூகம் சார்ந்த விழுமியங்கள் யாவை, கலாச்சாரம் கற்றுக்கொடுப்பது எதை, ஒரு தனி மனிதனின் கடமைகள் என்ன, குடும்பப் பொறுப்புகள் எவை, தாயை போற்றுவது எப்படி, பெண்களை மதிப்பது எப்படி, மனைவியை நேசிப்பது எப்படி, பெற்றோரை மதிக்கவேண்டிய குழந்தைகளின் கடப்பாடு என்ன என்று குடும்பத்தில் ஆரம்பித்து சமூகம், நாடு, உலகம் என்று பயணிக்கிறவிதமாகத் தம் பேச்சுக்களை வடிவமைத்துக் கொள்கிறார்.

முக்கியமான விஷயம் என்னவெனில் இம்மாதிரிப் பேச்சுக்களை யாராவது பேச ஆரம்பித்தால் இன்றைய சூழ்நிலையில் இந்த சமூகம் நின்று காதுகொடுத்துக் கேட்காது. ஆல்இந்தியா ரேடியோவைச் சேர்ந்த குமரிஎஸ். நீலகண்டன் சொல்வதுபோல் ‘நல்ல கருத்துக்களுக்கு எந்தக் கூட்டமும் இருப்பதில்லை. நல்ல அறிவுரைகள் எந்தக் காதுகளுக்கும் பிடிப்பதில்லை. இலக்கியங்கள் எவரையும் கவர்வதில்லை.’

ஆனால் சிவகுமாரின் பேச்சுக்களுக்கு இந்த சமூகம் காதுகளைக் கொடுக்கிறது.

பேச்சைக் கேட்க ஆயிரக்கணக்கில் கூட்டம் சேர்கிறது.

அதைத் தொடர்ந்து முக்கியமான பேச்சுக்கள் பிரபல சேனல்களில் திருவிழா ஸ்பெஷலாக ஒளிபரப்பப்படுகின்றன. கோடிக்கணக்கான மக்கள் காத்திருந்து பார்க்கிறார்கள்.  அந்தப் பேச்சுக்கள் அடங்கிய சிடிக்கள் பெருமளவில் விற்பனை ஆகின்றன. பல பெரிய மனிதர்களின் வீட்டுத் திருமணங்களில் இவருடைய சிடிக்கள் ஆயிரக்கணக்கில் வாங்கப்பட்டு வருகிறவர்களுக்கு தேங்காய்ப் பையுடன் இலவசமாக விநியோகிக்கப் படுகின்றன.

சமீபத்தில் கோயம்புத்தூரில் நடைபெற்ற கூட்டத்தில் சிவகுமார் பேச்சைக் கேட்பதற்காக உட்கார்ந்திருந்தபோது பக்கத்தில் இருந்த ஒரு பெரியவர் சொன்னார். “இரண்டு விஷயங்கள்……….. ஒண்ணு இம்மாதிரியான பேச்சுக்களை இன்னைக்கிப் பேசறதுக்கு ஆட்கள் கிடையாது. இரண்டாவது, அப்படியே யாராச்சும் பேசினாலும் யார் கேட்கப் போறாங்க? யாரும் கேட்கப் போறதில்லை. அது அப்படியே காத்தோடப் போயிரும். இவரு பேசறாருன்னா ஒவ்வொரு பேச்சும் எத்தனை மக்களைச் சென்றடையுது இல்லையா? அதிலும் இந்தப் பிள்ளைகளுக்கு இவர் சொல்ற அட்வைஸ் இருக்கு பாருங்க அதை மட்டும் கேட்டு நடந்தாங்கன்னா எதிர்காலத்தை சிறப்பா அமைச்சுக்கலாம். எத்தனைப் பெரிய கலைஞர் ஆனா தன்னை எத்தனை சிம்பிளா வெளிப்படுத்தறார் பாருங்க…… அதான் கரூரிலிருந்து புறப்பட்டு வந்திருக்கேன்”

சிவகுமாரின் வெற்றிக்குக் காரணம் சமூகத்தின் முக்கியமான விஷயங்களைப் பேசுபொருளாக எடுத்துக்கொள்கிறார்.


அதன் உயிர்நாடியைப் பிடிக்கிறார்.


மக்களுக்கு எந்தத் தொனியில் சொன்னால் போய்ச்சேருமோ அந்தத் தொனியில் அதனை வெளிப்படுத்துகிறார்.

ஆனால் இதைவிடவும் முக்கியமான விஷயம் வேறொன்று இருக்கிறது.

எந்த விஷயமாக இருந்தாலும் அதைச் சொல்கிறவர் யார், அவர் எப்படிப்பட்டவர், அதைச் சொல்கிற தகுதி அவருக்கு இருக்கிறதா என்பதைத்தான் முக்கியமாகப் பார்க்கிறது இந்தச் சமூகம்.

அவர் என்ன சொல்கிறாரோ அதற்கேற்ப தமது வாழ்வை அமைத்துக்கொண்டிருப்பவர்தானா என்பதைத்தான் மக்கள் முக்கியமாக கவனிக்கிறார்கள்.

ஒழுக்கம் பற்றிப் பேசுபவன் தன்னளவில் ஒழுக்கசீலனா என்பதைத்தான் அளவுகோலாக வைக்கிறார்கள்.

ஒழுக்கக்குறைவிற்கும், சீர்கேட்டிற்கும், தவறுகளுக்கும், மதுபானங்களுக்கும், காமக்களியாட்டங்களுக்கும்  பேர்போன திரைத்துறையில், நாற்பது வருடங்களுக்கும் மேல் பவனிவந்தும் தம்மைப் புடம்போட்டு எடுத்த தங்கமாக வைத்துக்கொண்டிருப்பவர் என்ற இவரது பிம்பம் இவர் சொல்வதை மக்கள் காதுகொடுத்துக் கேட்க வைக்கிறது.

சத்திய ஆவேசம் பொங்க இவர் சில கருத்துக்களை வெளிப்படுத்தும்போது இவரது மனதிலிருந்து வரும் கனல் கேட்பவர்களையும் அதே ஆவேசத்துடன் சுடுகிறது.

சிவாஜியின் புகழ்பெற்ற வசனங்களை, கலைஞர் எழுதிய காலத்தால் அழியாத வசனங்களை வீரியம் குறையாமல் மேடைகளில் பேசுபவர் என்றுதான் சிவகுமாரை முதலில் கவனிக்க ஆரம்பித்தது தமிழகம். பிறகு தம்முடன் பழகிய சக கலைஞர்களைப் பற்றிய அரிய தகவல்களை, மக்கள் அவ்வளவாக அறியாத தகவல்களை அழகாக எடுத்துரைப்பவர் என்பதாகவும் பார்க்க ஆரம்பித்தது. ஆனால் ‘பெண்’ என்ற தலைப்பில் எப்போது திருப்பூரில் பேசினாரோ அன்றையிலிருந்து இவரது பேச்சின் வடிவம் மாறியது. ஈரோடு புத்தகச் சந்தையில் இவரது பேச்சுக்கள் புதிய தளத்திற்கு வித்திட்டன. கம்பராமாயணத்தை நூறு பாடல்களில் சொல்லுவது என்று இவர் வடிவமைத்துச் சொன்ன ராமாயணக்கதை தமிழ்கூறு நல்லுலகம் இவரை வியப்புடன் பார்க்க வழிவகுத்தது.

இப்போதெல்லாம் தமிழகம் தாண்டி கடல்கடந்த தமிழர்களும் அடுத்து இவர் என்ன பேசப்போகிறார் என்பதற்காகக் காத்திருக்க ஆரம்பித்துவிட்டார்கள்.

மகாபாரதக் கதையை இரண்டுமணி நேரத்தில் சொல்லப்போவதாக அறிவித்து அதற்கான தயாரிப்பிலும் தற்போது ஈடுபட்டிருக்கிறார் என்பதனால் அந்த நிகழ்வு எப்போது என்பதற்கான எதிர்பார்ப்பு எகிறிக்கிடக்கிறது தமிழகத்தில்.

இரண்டுமணி நேரம் என்பது இரண்டரை மணி நேரமாகவும் ஆகலாம். ஆனால் அத்தனைக் குறுகிய நேரத்தில் மகாபாரதக்கதையைச் சொல்வது என்பதற்காக இவர் தேர்வு செய்திருக்கும் வடிவம் ரொம்பவும் புதுசு.


தொழிலதிபரும் வேதாத்ரி மகரிஷியின் அறிவுத்திருக்கோவில் நிர்வாகங்களுக்குத் தலைவரும் சமூக சேவகருமான மயிலானந்தத்திற்கு அவர் செய்துவரும் சேவைகளைப் பாராட்டி பத்மஸ்ரீ பட்டம் கிடைத்ததை கௌரவிக்கும் முகமாக கோவை கொடிசியா அரங்கில் நடைபெற்ற பாராட்டு விழாவில் வேதாத்ரி மகரிஷியின் போதனைகளை சாரமாகக் கொண்டு உரையாற்றினார் சிவகுமார்.

தலைப்பு; ‘அறம்செய விரும்பு’

முழு அளவுக்கும் வேதாத்ரி மகரிஷியின் அன்பர்களும் சீடர்களும் நிறைந்திருந்த அரங்கம் அது.
‘சாமான்யன் ஒருவன் சந்நியாசியான அதிசயம்’ என்ற வார்த்தைகளுடன் தமது உரையைத் துவங்கினார் சிவகுமார். இறைவனுக்கு வடிவமில்லை என்று வள்ளலார் போன்றே உரைத்தவர் வேதாத்ரி. ‘கடவுள் உணரக்கூடிய விஷயம்; விவாதம் பண்ண வேண்டிய விஷயம் அல்ல’ என்றுதான் காந்தியடிகளும் சொல்லியிருக்கிறார் என்று தொட்டுக்காட்டியவர் ‘மனைவியைக் கொண்டாடுங்கள்’ என்கிறார் வேதாத்ரி மகரிஷி. நாம என்ன செய்யறோமென்றால் பொம்பள சாமிகளைக் கும்பிடுவோம். பொம்பள சாமி கோவிலுக்குப் போவோம். வீட்டுக்கு வந்ததும் பொண்டாட்டியைத் தோப்புக்கரணம் போடவைப்போம்’ என்று ஆரம்பத்திலேயே சூடானார்.

பேச்சின் மையத்திற்குப் போவதற்கு முன்பு வேதாத்ரி மகரிஷி பற்றி சிவகுமார் சொல்லிய பல தகவல்கள் வேதாத்ரி மகரிஷியின் பக்தர்களுக்கே தெரிந்திருக்குமா என்பது சந்தேகம்தான். வேதாத்ரிக்குத் திருமணமானது, முதல் மனைவிக்குக் குழந்தை இல்லாததால் குடும்பத்தினரின் வற்புறுத்தல் காரணமாக இன்னொரு பெண்ணை மணமுடித்தது இரண்டு மனைவிகளையும் வைத்துக்கொண்டு உணவுக்குக்கூட வழியில்லாமல் சிரமப்பட்டது, குடியிருந்த வீட்டையும் இழந்து மனைவிகளுடன் நடுத்தெருவுக்கு வந்து நின்றது என்று ஆரம்பித்து அறிவியலையும் ஆன்மிகத்தையும் இணைத்து உலக அமைதிக்கும் மேம்பாட்டிற்குமான சிந்தனைகளை இன்றைய வாழ்க்கைக்கான நடைமுறை அனுபவங்களுடன்  அவர் சொல்லியிருப்பது பற்றி விரிவாகப் பேசிவிட்டு நல்ல வாழ்க்கைக்கு எதெதை விட்டொழிக்க வேண்டும் என்று மகரிஷி சொல்லியிருக்கிறார் என்ற விஷயத்துக்கு வந்தார்.

பேராசை, சினம், கடும்பற்று, முறையற்ற பால்கவர்ச்சி, உயர்வுதாழ்வு மனப்பான்மை, வஞ்சம் இந்த ஆறையும் விட்டொழிக்கவேண்டும் என்று வேதாத்ரி மகரிஷி கூறுகிறார் என்று சொன்னவர் அந்த ஆறு விஷயங்களுக்கும் சொன்ன உதாரணங்களும் சின்னச் சின்ன வாழ்க்கை சம்பவங்களும்தாம் பேச்சை எங்கோ உயரத்திற்குக் கொண்டுசென்று நிறுத்தின.

‘ஆசை வேறு தேவை வேறு பேராசை வேறு’ என்பதற்கு ஒரு பெரும் பணக்காரரின் பேராசைகள் அவரை எந்த நிலைக்குக் கொண்டு சென்று நிறுத்தின என்ற விவரங்களை இவர் சொல்லியவிதம் எவரையுமே யோசிக்கத் தூண்டும்.

அடுத்து சினம் பற்றிப் பேசவந்தவர் ஓவியர் மனோகர் தேவதாஸின், உண்மைக்கதையைச் சொன்னார். ஓவியர் மனோகர் தேவதாஸும் அவரது இளம் மனைவியும் காரில் போய்க்கொண்டிருக்கின்றனர். மனைவி காரை ஓட்டிச் செல்கிறார். இளம்பெண்கள் வாகனங்கள் ஓட்டிச் சென்றால் அதைப் பொறுக்காமல் பின்னாலேயே வந்து வம்பு செய்யும் பொறுக்கிக்கூட்டம் இவரையும் அப்படியே செய்கிறது. பயங்கரமாக விசில் அடித்து கேலிசெய்து காரைத் தொடர்ந்து விரட்டியபடியே தொல்லை தருகிறது. என்ன செய்தும் சேஸிங்கை விடமாட்டேனென்கிறார்கள் அந்த இளைஞர்கள். பொறுத்துப் பொறுத்துப் பார்த்த அந்த இளம்பெண் காரை 160 மைல் வேகத்துக்கு விரட்டுகிறார். சிறிது தூரம்தான். அந்த சிறிது தூரத்திலேயே அபாயம் காத்திருப்பது தெரியவில்லை. கொஞ்ச தூரத்திலேயே ஒரு பயங்கரத் திருப்பம். பிரேக் பிடிக்கமுடியாமல் தலைகீழாகப் புரள்கிறது கார்.

விளைவு, தம்பதியர் இருவரும் மோசமான விபத்தில் சிக்குகிறார்கள்.

கணவருக்கு பலத்த அடி. மனைவிக்கோ கழுத்துக்குக் கீழே எல்லா உறுப்புக்களும் செயலிழந்துபோய் படுத்த படுக்கைக்கு ஆளாகிறார். ஒருநாள் இரண்டு நாள் அல்ல. அடுத்து முப்பத்தைந்து ஆண்டுகளுக்கு இதே நிலையில் படுக்கையில் கிடந்த மனைவிக்கு சிரம பரிகாரம் பண்ணுகிறார் கணவர். இதில் கணவருக்குக் கண்பார்வை வேறு படிப்படியாகக் குறைந்துகொண்டே வந்து கடைசியில் முழுப்பார்வையும் பறிபோய்விடுகிறது. அந்த நிலையிலும் மனைவியை கவனித்து அந்த அம்மாளின் இறுதி மூச்சுவரை உடனிருந்து கவனிக்கிறார். இன்னமும் நடைப்பிணமாய் இன்றைக்கும் வாழ்ந்துவரும் தேவதாஸின் கதையைச் சொல்லிவிட்டு “ஒரு கணம் ஒரேயொரு கணம் அந்த அம்மாள் மட்டும் சினத்துக்கு ஆளாகாமல் ‘என்ன தம்பிகளா என்னை சேஸிங் பண்றதுதான் உங்க விருப்பமா? நான் காரை நிறுத்திக்கறேன். நீங்க வேணா போய்க்கங்க” என்று விட்டுக்கொடுத்திருந்தால் முப்பத்தைந்து வருடம் இப்படி வாழவேண்டி வந்திருக்குமா?’ என்று சோகத்துடன் கேட்டு நிறுத்தும்போது கேட்கிறவர்களின் நெஞ்சம் விம்மித் தணிவதை தவிர்க்கமுடிவதில்லை.

படக்காட்சி முடிந்ததும் இதுபற்றிக் கருத்துத் தெரிவித்த திரு சுடலைக்கண்ணன் ஐஏஎஸ் அவர்களின் திருமதி “ஒரு பெண் கார் ஓட்டிச் சென்றாலேயே சில இளைஞர்களுக்குப் பிடிப்பதில்லை. தொடர்ந்து வந்து வம்பிழுப்பது, கார் ஓட்டுகிறவர்களின் கவனம் கலையுமாறு நடந்துகொள்வது, கூச்சலிடுவது ஊளையிடுவது போன்றதெல்லாம் செய்கிறார்கள். ஒருமுறை நான் கார் ஓட்டிச் செல்லும்போது எதிரில் ஒரு சவ ஊர்வலம் வந்தது. ஓரத்தில் காரை ஒதுக்கினேன். உடனே சில இளைஞர்கள் சவப்பெட்டியில் இருந்த பூக்களை எடுத்து என் காரின்மீது இறைத்தார்கள். இப்படித்தான் நடந்துகொள்கிறார்கள், என்ன செய்வது?” என்று தமது வருத்தத்தைத் தெரிவித்தார்.

முறையற்ற பால்கவர்ச்சி பற்றிப் பேசும்போது வி.எஸ்.காண்டேகரின் யயாதி கதையைச் சொல்லும் சிவகுமார், ‘செக்ஸ் என்பது அனுபவித்துத் தீர்ப்பதற்கு அல்ல; அடக்கி ஆள்வதற்கு’ என்கிறார். ‘வங்காள விரிகுடாக்கடலை நீச்சலடித்துக் கடக்க முடியுமா என்ன? நீந்திக் கடந்தவன் யாருமில்லை. அடக்கி ஆள்பவன்தான் இருக்கிறான்’ என்கிறார்.

காரல் மார்க்ஸ் – ஜென்னி இருவரின் வாழ்க்கை, ஜெயப்பிரகாஷ் நாராயண் பிரபாவதி ஆகியோரின் வாழ்க்கை அனுபவம், பாஞ்சாலி பற்றிய பாரதியின் வரிகள், சீதை, கண்ணகி என்று சிவகுமார் பயணிக்கும் தளம் ஆச்சரியப்படுத்துகிறது.

அறம்செய விரும்பு, ஆறுவது சினம், இயல்வது கரவேல், ஏற்பது இகழ்ச்சி……………என்று ஆத்திச்சூடியில் சொல்லிச் செல்வதுபோல் வேதாத்ரி மகரிஷியின் கடைப்பிடிக்கவேண்டிய சொற்றொடர்களை எடுத்துக்கொண்ட சிவகுமார் ஒவ்வொரு வார்த்தைக்கும் ஒவ்வொரு விளக்கம் தந்துசெல்வது என்று பேச்சின் பாதையை வகுத்துக்கொள்கிறார்.

அதிலும் இரண்டு பிரிவுகள்.

முதலில் பேராசை, சினம் என்று தொடங்கி வஞ்சத்தில் முடித்தவர் அடுத்த பகுதியை ஏழ்மையிலும் நேர்மை, கோபத்திலும் பொறுமை, தோல்வியிலும் விடாமுயற்சி, வறுமையிலும் பரோபகாரம், துன்பத்திலும் தைரியம், செல்வத்திலும் எளிமை, பதவியிலும் பணிவு என்று ஏழு பகுதிகளாக எடுத்துக்கொள்கிறார்.

ஏழு சொற்றொடருக்கும் ஒவ்வொரு கதை. அல்லது ஒவ்வொரு உதாரணம்.

அத்தனை உதாரணங்களும் அதுபாட்டுக்கு செவியைக் கடந்து மனதிற்குள் ஊடுருவி தனக்கென்று ஒரு பத்திரமான இடத்தைத் தேடிப்பிடித்து நாற்காலி போட்டு உட்கார்ந்துகொள்கிறது. அந்த அளவு வலிமை, அந்த அளவு எதார்த்தம். 

மக்களின் கையைப் பிடித்து உண்மைக்கு மிக நெருக்கமாகவே பயணிக்கச் செய்வதால் உதாரணங்களும் அதற்கான குறியீடுகளும் அது உணர்த்தும் செய்தியும் மிகச் சுலபமாக உள்ளே நுழைந்து மனதில் உட்கார்ந்து பிறகு மனதைவிட்டு அகல மறுக்கின்றன.

ஏழ்மையிலும் நேர்மை – ஒரு ஆட்டோக்காரரின் நேர்மை,

கோபத்திலும் பொறுமை – காரில் அடிபட்டு விழும் பேப்பர் போடும் சிறுவன்,

தோல்வியிலும் விடாமுயற்சி – அக்னிசாட்சி தோல்விக்குப்பின் வீறு கொண்டு எழுந்து சிந்துபைரவி என்ற படத்தை வெற்றிப்படமாக்கும் கே.பாலச்சந்தர்,

வறுமையிலும் பரோபகாரம் – அகரம் பவுண்டேஷன் சார்பில் ஐந்தாயிரம் ரூபாய் பண உதவி பெறும் கிழிந்த ட்ரவுசர் போட்டுவரும் சிறுவன், ‘இந்தப் பணம் தனக்கு மிக அதிகம் என்றும் ‘நேற்றுதான் நடிகர் விஜய் எனக்கு ஐந்தாயிரம் தந்தார்; எனக்கு அதுவே போதும். ஆகவே இந்தப் பணத்தை கிழிந்த பாவாடை சட்டை போட்டுவரும் சிறுமிகளுக்கு நல்ல பாவாடை சட்டை வாங்குவதற்குத் தந்துவிடுகிறேன்’ என்று அறிவிப்பது,

துன்பத்திலும் தைரியம் – டிபி ஹாஸ்பிடலில் நோயாளிகள் சாப்பிட்டுவிட்டுப் போடும் ரொட்டித்துண்டை எடுத்து வயிறுவளர்க்கும் தாய் ஒருவர் தன்னுடைய மகன் விபத்தில் திடீர் என்று இறந்துவிட அவனது உறுப்புக்களை மற்றவர்களுக்கு தானம் செய்ய முன்வருவது,
செல்வத்திலும் எளிமை – இந்த வார்த்தைக்கு அருட்செல்வர் நா.மகாலிங்கம் உதாரணம் காட்டப்படுகிறார்,

பதவியிலும் பணிவு –இந்த வார்த்தைக்கு சிவகுமார் சொல்லும் விளக்கம் இன்றைய அரசியல் தலைவர்களை பலத்த சர்ச்சைக்குள் தள்ளி அவர்களின் மனோபாவத்தைக் கேள்விக்குள்ளாக்குகிறது.

57-ல் காமராஜர் முதல்வர். அப்போது அரசு ஒரு கொள்கை முடிவு எடுக்கிறதாம். அதாவது அரசாங்கத்தில் பியூன் வேலையில் இருப்பவன்  எல்லாம் எட்டாவது படிப்பை முடித்தவனாக இருக்கவேண்டும். இந்த அறிவிப்பு வந்தவுடன் எம்எல்ஏ ஹாஸ்டலில் வேலையில் இருந்த ஒரு பியூன் மிகவும் வருத்தத்தில் ஆழ்கிறார். ஏனெனில் இந்த அறிவிப்பு நடைமுறைப் படுத்தினால் தன்னுடைய வேலை போய்விடும். தன்னுடைய வேதனையை எம்எல்ஏ ஹாஸ்டலில் வைத்துப் புலம்புகிறார். ‘வெறும் ஐந்தாங்கிளாஸ் படித்தவர் முதலமைச்சராக வரலாம். ஆனால் எட்டாவது படிக்கவில்லையென்றால் பியூன் வேலைக்குக்கூட லாயக்கில்லை என்றால் என்ன அர்த்தம்?’
இவரது புலம்பலைக் கேட்ட அப்போதைய எம்எல்ஏவான திரு மூக்கையாதேவர் “இதை நீ காமராஜர் வீட்டிற்கு போன் போட்டு அவரது உதவியாளரிடம் சொல்லு. அவர் காமராஜரிடம் சொல்லி உனக்கு ஏதாவது வழி செய்வார்” என்று சொல்லி காமராஜர் வீட்டிற்கு போன் போட்டுத் தருகிறார்.

அந்த முனையில் போன் எடுக்கப்படுகிறது.

இங்கிருந்து இந்தப் பியூன் தன்னுடைய ஆதங்கத்தைச் சொல்கிறார். “இந்தப் புதிய உத்தரவால் என்னுடைய வேலை பறிபோகப் போகிறது. ஏங்க, அஞ்சாவது படிச்சவர் முதலமைச்சரா வரலாம் என்றால் ஒரு பியூன் எட்டாவது படிச்சவனாத்தான் இருக்கணும்ங்கறது என்ன நியாயம்?”

“உண்மைதான் நிச்சயமா நியாயம் கிடையாது. நீ சொல்றது உண்மைதான்” என்று பதில் வருகிறது.

“இதைக் கொஞ்சம் காமராஜர்கிட்டே சொல்லிடறீங்களா?”

“நான் காமராஜர்தான் பேசுகிறேன்” என்று பதில் வருகிறது.

இந்தப் பியூன் ஆடிப்போகிறார். உடம்பெல்லாம் வெலவெலத்துப் போகிறது.”ஐயா ஐயா தெரியாமப் பேசிட்டேன். என்னை மன்னிச்சிருங்கய்யா’ என்று இவர் பதற-

“அதெல்லாம் ஒண்ணுமில்லை. நீ சரியாய்த்தான் பேசியிருக்கே. நாளைக்குக் காலையில நீ என்னை வந்து பார்” என்று சொல்லி போனை வைக்கிறார் காமராஜர்.

மறுநாள் பயந்துகொண்டே போக அருகில் அழைத்து அரவணைத்து சோபாவில் தம் பக்கத்தில் அமர வைக்கிறார். எல்லா விஷயங்களையும் கேட்டுக்கொண்டவர் “உன்னுடைய உத்தியோகத்துக்கு ஒண்ணும் தொந்தரவு வராது. இப்ப இருக்கறவங்க இருந்துட்டுப் போகட்டும். இனிமே புதுசா வர்றவங்க எட்டாவது படிச்சிருக்கணும் என்று உத்தரவு போடுகிறேன் போதுமா?” என்று கேட்டு அனுப்பிவைக்கிறார்.

இந்த சம்பவத்தை சிவகுமார் விவரிக்கும்போது ‘அடாடா எத்தனைப் பெரிய தலைவர் அவர்’ என்று நெஞ்சம் விம்முவதை அடக்கமுடியவில்லை.

இந்தச் செய்திகளை எல்லாம் எந்த மாடுலேஷனில் எப்படித் தரவேண்டும் என்பது சிவகுமார் என்ற பண்பட்ட திரைக்கலைஞருக்கே உரித்தான பிரசன்டேஷன் என்றுதான் சொல்லவேண்டும். நிச்சயம் அவர் திரையில் நடிக்காமல் நேரடியாக மேடைகளுக்கு வந்திருந்தால் இந்த வகை presentation

சாத்தியப்பட்டிருக்க வாய்ப்பில்லை.


இந்த உரையைக் கேட்டுவிட்டுச் சென்ற ராஜாராம் ஐஏஎஸ் ‘நாங்கள் உங்கள் வடிவில் விவேகானந்தரைப் பார்க்கிறோம். எந்திரத்தனமாகிவிட்ட இன்றைய நாகரிக உலகில் மனித இனம் இழந்துவிட்ட நல்ல தன்மைகளை மீட்டெடுக்க மனதை விழித்தெழவைக்கும் பணியை உங்கள் உரை செய்கிறது” – என்று செய்தி அனுப்புகிறார்.

What a wonderful presentation…..Every story starts and ends with values. To days youth have to get exposed to these value system. I hope your wisdom spreads to every home by air DVD and also in you tube – என்று செய்தி தருகிறார் முன்னாள் குடியரசுத்தலைவர் அப்துல் கலாமின் ஆலோசகர் வி.பொன்ராஜ்.

“In my view the message can be taken to younger generation of today only in this form” என்று குறிப்பிடும் சுடலைக்கண்ணன் ஐஏஎஸ், “very informative well structured and aptly presented. As usual it is one of your great service to the younger generation” என்கிறார்.

“மகரிஷியே உங்கள் வடிவத்தில் வந்து பேசியது போல் உணர்ந்தேன்” என்கிறார் எம்.மோகன்.

முன்னாள் பேராசிரியரும் தற்போதைய தொழிலதிபருமான பழனி ஜி பெரியசாமி “உங்கள் உரை தந்த இந்த வித்தியாசமான அனுபவத்தை என்னால் என்றும் மறக்கமுடியாது” என்று ஆரம்பிக்கிறார். “The way you have interpreted and explained the real life situation was so overwhelming and impressive that everybody was touched with your deep sense of scholastic, intellectual and moral explanation. Every aspect of the speech, you have addressed us to how we should live a happy and purposeful life based on some fundamental values. It is a great guide for leading a noble life. I know those who had attended the event were emotionally touched by your eloquence and intrinsic and deep knowledge of Maharishi. I feel proud of you. You are an extraordinary man. You are not only a great actor, a noble painter, an artist, a speaker but also a great human being trying to live by example. I am indebted to you for having invited me to participate in this most unique intellectual and moral experience…என்று தமது கருத்தைப் பிரதிபலிக்கிறார் அவர்.

இந்த உரையில் சிவகுமார் பேசியதிலேயே ஹைலைட்டான விஷயம் ஒன்றுண்டு. அது ‘உயர்வு தாழ்வு மனப்பான்மை’ என்ற தலைப்பில் வருகிறது. உண்மையில் இந்த விஷயத்தை ஒரு பொதுமேடையில், அதுவும் இத்தனை ஆயிரம் பேர் குழுமியிருக்கும் ஒரு மேடையில் சிவகுமார் போன்ற ஒரு பிரபலம் பேசுவதற்கே முதலில் தயங்குவார்கள். அப்படியே பேச நேர்கிறது என்றாலும் மேலோட்டமாகவோ பூடகமாகவோ பேசிவிட்டுக் கூடுமானவரை அவசரமாகக் கடந்துசெல்லத்தான் பார்ப்பார்கள். ஆனால் இந்த விஷயத்தை சிவகுமார் நின்று நிதானித்து, அழுத்தம் கொடுத்து, கேட்கிற அத்தனைப் பேரின் மனதிலும் சென்று ஈட்டி போல் இறங்குகிற தொனியில் பேசுகிறார். இந்த சமூகத்தையும் அரசாங்கத்தையும் குற்றவாளிக் கூண்டிலே நிறுத்திக் கேள்வி கேட்கிறார். ஏற்கெனவே லேசுபாசாக செம்மொழி மாநாட்டில் இதுபற்றிப் பேசியிருந்தபோதிலும் இன்னமும் அழுத்தம் கொடுத்து இங்கேயும் அதுபற்றிப் பேசினார் அவர்.

அவர் பேசியது கையால் மலம் அள்ளும் தொழிலாளர்களைப் பற்றி.

“தொழில் முறையிலே பிறந்தவர்களை பிறப்பின் அடிப்படையில் பிரித்து பத்து சதவிகித மக்கள் தொண்ணூறு சதவிகித மக்களை ஆயிரக்கணக்கான ஆண்டுகளாக சுரண்டிக்கொண்டிருந்தார்கள்.” என்று ஆரம்பிக்கிறவர் நேரடியாகவே விஷயத்துக்கு வருகிறார். “இந்த நாட்டில் இன்னமும் எட்டு லட்சம் சகோதரர்கள் கையால் மலம் அள்ளிக்கொண்டிருக்கிறார்கள். தமிழ்நாட்டில் மட்டும் இருபத்தி ஏழாயிரம்பேர் கையால் மலம் அள்ளுகிறார்கள். நம்முடைய மலத்தையே நாம் பார்ப்பதற்குக்கூட எத்தனைக் கூச்சப்படுகிறோம். எவ்வளவு அருவெறுப்பு அடைகிறோம். 


எப்போதாவது ஒருமுறை டாக்டர் மோஷன் டெஸ்ட் செய்யவேண்டும் என்று சொல்லிவிட்டால் நம்முடைய மலத்தை அதுவும் ஒரு ஸ்பூன் மலத்தை எடுத்து ஒரு பாட்டிலில் போட்டு எடுத்துப்போவதற்குள் எத்தனை அருவெறுப்பு கொள்கிறோம். யோசித்துப் பாருங்கள். 

கோடிக்கணக்கான மக்களின் மலத்தை தினசரி கைகளால் அள்ளிக்கொண்டிருக்கிறார்கள். இதனை இந்த நாட்டில் உடனடியாகத் தடுத்து நிறுத்த வேண்டும். மாற்று ஏற்பாடுகள் செய்யவேண்டும். 

இதெல்லாம் செய்யாமல் சும்மா ஆன்மிக பூமி என்றெல்லாம் பேசிக்கொண்டிருப்பதில் ஒரு பயனும் இல்லை. செவ்வாய்க் கிரகத்துக்கு ராக்கெட் அனுப்புவதில் பிரயோசனம் இல்லை. முதலில் இந்தப் பிரச்சினைக்கு ஒரு முடிவு கட்டவேண்டும்” என்று சிவகுமார் முழங்கியபோது கேட்கிறவர்கள் 

ஒருகணம் ஆடித்தான் போனார்கள்.

கொடிசியா அரங்கில் சிவகுமார் பேசியதைக் கேட்டுவிட்டு இந்தப் பிரிவியூவில் படக்காட்சியாகப் பார்த்தபோது நிறைய வித்தியாசம் இருந்தது. அங்கே வெறும் பேச்சு மட்டும்தான். இப்போது பேச்சுக்களுக்கான படங்களும்  இணைத்திருந்தது. அதிலும் சில புகைப்படங்கள் எடுப்பதற்காக அவரே புகைப்படக்காரருடன் சிந்தாதிரிப்பேட்டை போன்ற ஏரியாக்களுக்குச் சென்றிருந்தார் என்பதை அறிந்தபோது அந்த மனிதரின் அர்ப்பணிப்பு வியக்கவைத்தது.

நிஜமாகவே ஒரு மாறுபட்ட அனுபவம்தான், என்னவிதமான தாக்கத்தை ஏற்படுத்தப்போகிறது என்பதுதான் முக்கியம்.

Sunday, October 13, 2013

இளையராஜாவின் சிம்பொனி வெளிவந்ததா? வெளிவரவில்லையா?



  
தமிழ்த்திரை இசை பற்றிய பதிவுகளை இணையத்தில் எழுதும்போது இளையராஜா பற்றிய இந்த ஒரு விஷயம் மட்டும் சரியான தகவல்களுடன் விவாதத்திற்கு வராமல், பல்வேறு தரவுகளை எடுத்துவந்து அலசாமல், 

‘இதோ பார் இதுதான் சான்று சிம்பொனி வந்திருக்கிறது’. இல்லாவிட்டால் ‘இந்தந்தக் காரணங்களால் வராமல் போய்விட்டது’ என்றெல்லாம் சரியான தகவல்கள் சொல்லப்படாமல்- கமுக்கமாய்க் கடந்துசெல்லப்பட்டு வருகிறது. 

“இந்த விஷயம் ஒரு புனிதப்பசுவைப் போல் காப்பாற்றப்படுவது ஏன் என்று தெரியவில்லை” என்று குறிப்பிட்டார் என் நண்பர் ஒருவர்.

அது எத்தனைப் பெரிய விஷயமாக இருந்தாலும் எப்பேர்ப்பட்டவர்களைப் பற்றிய விஷயமாக இருந்தாலும், எப்படி யார் மூடிமறைக்க முயன்றாலும் இணையத்தில் மட்டும் அது நடக்காது. எப்படியும் உண்மைகளை வெளிக்கொணர்ந்துவிடுவார்கள். இணையத்தின் சிறப்புத்தன்மையே அதுதான் என்று சொல்லப்படுவதெல்லாம் மற்ற விஷயங்களுக்குத்தான். இந்த ஒரு விஷயத்திற்கு மட்டும் அந்தத் தாரகமந்திரம் பொருந்தாது என்பதுபோல்தான் விஷயங்களும் நடந்துகொண்டு வருகின்றன.

எப்படிப்பட்ட அரசாங்க ரகசியங்களாக இருந்தாலும்  வெளியே கொண்டுவந்துவிடுகிறார்கள். மிகப்பெரிய வர்த்தக சாம்ராஜ்யங்கள் பற்றிய விஷயங்களை அள்ளிக்கொண்டுவந்து வெளியே கொட்டுகிறார்கள்.

போலீஸ்துறையில் நடைபெறும் அக்கிரமங்களைக் கொஞ்சம்கூட பயப்படாமல் வெளியில் சொல்லுகிறார்கள்.

நீதித்துறையே தவறான தீர்ப்புகளை வழங்குகிறது என்றெல்லாம் அலசுகிறார்கள். சிபிஐயைக் கேள்வி கேட்கிறார்கள்.

நீரா ராடியா பல ‘படா படா சூராதி சூரர்களுடன்’ பேசிய டெலிபோன் தகவல்களையெல்லாம்கூட ஒற்றுக்கேட்டு ஒன்றுவிடாமல் இணையத்தில் ஏற்றிப் பிரித்து மேய்கிறார்கள்.

இளையராஜாவின் சிம்பனியை மட்டும் வந்ததா வரவில்லையா,

இருக்கிறதா இல்லையா,

அங்கீகரிக்கப்பட்டதா நிராகரிக்கப்பட்டுவிட்டதா?

அப்படி அங்கீகரிக்கப்பட்டு வெளியிடப்பட்டிருந்தால் எங்கே கிடைக்கிறது?

நிராகரிக்கப்பட்டிருந்தால் அது ஏன் சொல்லப்படவில்லை? என்கிற கேள்விகள் எல்லாம் அப்படியே அந்தரத்திலேயே தொக்கி நிற்கின்றன.

இளையராஜா சிம்பனிக்காக இசை அமைத்தார் என்பது எல்லாருக்கும் தெரியும். அதற்காக அவர் வெளிநாட்டுப் பயணம் மேற்கொண்டது தெரியும். டோரன்டோவுக்கோ, பிலடெல்பியாவுக்கோ எங்கோ சென்றுவந்தார் என்பதும் தெரியும். அந்த இசையமைப்பு பதிவானதையும் சன் டிவி மிகப்பிரமாதமாய் இரண்டு வாரங்களுக்கு அந்த நிகழ்ச்சியை மிக ஆர்ப்பாட்டமாய் ஒளிபரப்பியதும் தெரியும். மீண்டும் மறுஒளிபரப்பு செய்ததும் தெரியும். அதுபற்றிய பேட்டிகளில் இளையராஜா கலந்துகொண்டு பேசியது தெரியும். இதற்காக அவருக்கு மிகப்பெரிய பாராட்டுவிழா நடைபெற்றது தெரியும். அதுபற்றி எழுதாத தமிழ்ப் பத்திரிகைகளே இல்லையென்பதும் தெரியும். மற்ற பத்திரிகைகளிலும் இளையராஜா இதற்காகக் கொண்டாடப்பட்டார் என்பதும் தெரியும்.

இதோ சமீபத்தில்கூட ஒரு வெளிநாட்டுக்காரரை அழைத்துவந்து இளையராஜா சம்பந்தப்பட்ட விழாவொன்றில் கௌரவித்தார்கள். இளையராஜா அமைத்த சிம்பொனி ஆர்க்கெஸ்ட்ராவைக் கண்டக்ட் செய்தவர் இவர் என்று சொன்னார்கள். இத்தனையும் நடக்கிறது.


எல்லாம் சரி. சிம்பனி வெளிவந்ததா இல்லையா?


யாருக்கும் தெரியாது.

இந்த ஒரு விஷயத்தில் மட்டும் எதற்காக இப்படியொரு மூடுமந்திரம்?

எல்லாவற்றையும் அக்குவேறு ஆணிவேறாகப் பிரித்துப்போட்டு அலசித் துவைத்துக் காயவைக்கும் இணையத்தில் இந்த ஒரு விஷயத்தை மட்டும் ஏன் யாருமே பேசத்துணிவதில்லை?

எதைக் காப்பாற்றுவதற்காக இப்படியொரு ரகசியத்தைப் பேணிப் பாதுகாத்துவருகிறார்கள்?

இளையராஜா என்பவர் விமர்சனங்களுக்கு அப்பாற்பட்டவரா? அவரைப் போற்றிக் கொண்டாடப்படும் செய்திகள் மட்டும்தான் இங்கே பேசப்படவேண்டும். அவரைக் கேள்விக்குட்படுத்தும் மிகச்சிறிய விமர்சனங்களுக்கோ உண்மைச் செய்திகளுக்கோ கிஞ்சித்தும் அனுமதி கிடையாது என்பது என்ன மாதிரியான சண்டியர்த்தனம் என்பது தெரியவில்லை.

சிவாஜி கணேசனை ஒன்றுமில்லை என்று எழுதுகிறார்கள். கண்ணதாசனைக் குடிகார கவிஞன் என்கிறார்கள். எம்ஜிஆரை, மன்மோகன் சிங்கை, சோனியாவை, மோடியை எல்லாரைப் பற்றியும் கேள்விப் பட்டிராத கோணங்களில் எல்லாம் பிரித்துப்போட்டு விமர்சிக்கிறார்கள். ஏதாவது ஒரு விஷயம் வெளிவந்துவிட்டால் உடனே அந்த விஷயம் உண்மைதானா என்று கண்டறிய எத்தனைப் பிரயத்தனப்படுகிறார்கள்?

ஸ்டாலினுக்கு ஒரு வெளிநாட்டுப் பல்கலைக் கழகத்தின் பேரால் டாக்டர் பட்டம் வழங்கப்படுகிறது என்று ஒரு செய்தி வந்தால் அது உண்மையான பல்கலைக் கழகமா? கொடுக்கப்பட்ட டாக்டர் பட்டம் உண்மையானதுதானா? என்றெல்லாம் பூமியைப் பிளந்து பதினைந்தாயிரம் அடி உள்ளே சென்று உண்மைத் தகவல்களை அள்ளி வருவார்களா மாட்டார்களா? கருணாநிதிக்கு ஏதோ ஒரு நாட்டில் ஸ்டாம்ப் வெளியிடுகிறார்கள் என்று செய்தி வந்தால் அது அரசாங்கம் வெளியிட்ட தபால்தலையா, இல்லை யார் வேண்டுமானாலும் காசு கொடுத்தால் அப்படி வெளியிட்டுக்கொள்ள முடியுமா என்றெல்லாம் துப்பறியும் கட்டுரைகள் வெளிவருகிறதா இல்லையா? கருணாநிதி தொடங்கி இன்றைய தமிழருவி மணியன்வரையிலும் அத்தனைப் பேரையும் எத்தனை எத்தனை விமர்சனங்களுக்கு ஆட்படுத்துகிறார்கள்? என்னென்ன விதமான கேள்விகளையெல்லாம் முன்வைக்கிறார்கள்…..

ஜெயலலிதாவுக்கோ, கருணாநிதிக்கோ, ஜெயகாந்தனுக்கோ, அல்லது கமல் ரஜினி போன்றவர்களுக்கோ ஏதோ ஒரு சிறப்புப் பட்டம் வழங்கப்படுகிறது என்றால் அது யாரால் வழங்கப்பட்டுள்ளது, அது உண்மையானதுதானா அல்லது டுபாக்கூரா அதனை வாங்குவதற்கு அல்லது பெறுவதற்கு இவர்கள் தரப்பில் என்னென்ன செய்யப்பட்டுள்ளது, யார் யார் முன்னின்று செய்தார்கள் அல்லது உண்மையானதாகவே இருக்கும்பட்சத்தில் அது எவ்வளவு சிறப்புக்குரியது என்பதுபோன்ற விவரங்கள் எல்லாமே இணையத்தில் அலசப்படுகிறதா இல்லையா? அதன் பூர்விகம் என்ன நதிமூலம் என்ன எல்லாமே தோண்டித் துருவப்படுகிறதா இல்லையா?

இவருடைய விஷயத்தில் மட்டும் என்ன நடக்கிறது?

ஏன் இந்த கனத்த மவுனம்? எதற்காக இப்படிப்பட்ட ஒரு இறுக்கமான ஜமக்காளப் போர்வை?


இவர் மட்டும்தான் மக்களின் அபிமானம் பெற்றவர், மற்றவர்களெல்லாம் மக்கள் தொடர்பே இல்லாதவர்கள் மக்களால் மதிக்கவே படாதவர்கள் என்று அர்த்தமா?

ஒன்று இதோ சிம்பனி வெளிவந்துவிட்டது என்று சொல்லப்பட வேண்டும்.

இல்லாவிட்டால் முயற்சி செய்யப்பட்டது, அங்கீகரிக்கப்படவில்லை என்ற செய்தியாவது அதிகாரபூர்வமாகச் சொல்லப்படவேண்டும்.

இதுவுமில்லாமல் அதுவுமில்லாமல் இருக்கிறதா?

பேசாமலாவது இருக்கவேண்டும். 

பண்ணைப்புரத்திலிருந்து பிலடெல்பியாவரை என்ற தலைப்பில் கட்டுரை வருகிறது.
சினிமாவிலிருந்து சிம்பொனிவரை என்று புகழ்மாலைகள் சூட்டப்படுகின்றன.

மியூசிக் டைரக்டராயிருந்து மேஸ்ட்ரோவானவர் என்று புகழ்கிறார்கள். இவையெல்லாமே சிம்பொனி அமைத்தவர் என்ற அர்த்தம் தொனிக்கும் வார்த்தைகள்தாமே? சிம்பொனி உண்மையிலேயே வெளியிடப்படவில்லை என்றால் “சிம்பொனி முயற்சி தோல்வியில் முடிந்துவிட்டது. எனவே யாரும் என்னை அதனோடு சம்பந்தப்படுத்திப் பேசாதீர்கள்” என்று இளையராஜா சொல்லவேண்டுமா வேண்டாமா?

ஒரு முறை இதுபற்றி விகடன் பேட்டியில் கேட்கப்பட்டபோது “அதுபற்றி இப்போது பேசவேண்டாம்” என்றுதான் சொன்னார் இளையராஜா.

எப்போது பேசலாம் என்பதை அவர் சொல்லவில்லை.

எனவே மூடுமந்திரம் தொடர்ந்துகொண்டே இருக்கிறது.

சிம்பனி அமைப்பது என்பது ஒரு பெரிய பகீரத முயற்சி. கல்லூரிப் பட்டம் பெற்றவர்கள் ஐஏஎஸ் தேர்வு எழுதுவதுபோல. தேர்வு எழுதுவதற்காக விசேஷமாய்ப் படித்தது சரி; பல்வேறு முயற்சிகளை மேற்கொண்டது சரி. அத்தனை முயற்சிகளையும் சேர்த்துவைத்து ஐஏஎஸ் பரீட்சை எழுதுவது சரி. ஆனால் தேர்வு செய்யப்படுவது என்று ஒன்றிருக்கிறதே. அங்கீகாரம் பெறுவது என்று ஒன்றிருக்கிறதே. தேர்வாகாவிட்டால் நம்மை ஐஏஎஸ் என்று அழைத்துக்கொள்ள முடியுமா என்ன? அங்கீகாரம் பெறாவிட்டால் ஐஏஎஸ் என்ற பந்தாவுடன் வலம் வரமுடியுமா என்ன?

ஆனால் அதுதான் இங்கே நடைபெறுகிறது. இளையராஜா சிம்பனி அமைத்தவர் என்றுதான் இன்னமும் லட்சக்கணக்கான மக்களால் நம்பப்படுகிறார்,

புகழப்படுகிறார்,

போற்றப்படுகிறார்.

இதுபற்றி யாரும் கேள்வி எழுப்பவில்லை. யாருக்கும் இதுபற்றிய சந்தேகங்களும் இல்லை.

நான் இணையத்தில் இதுபற்றி லேசுபாசாக எழுப்பிய சந்தேகங்களுக்கும் உரிய பதில்கள் இல்லை. அதனைத் துருவி ஆராய்ந்து பதிவுகள் வெளியிடப்படவில்லை. வெறும் அர்ச்சனைகளும் வசவுகளும்தான் வருகின்றன.

இந்தப்போக்கு நேர்மையான நியாயமான ஒன்றாகத் தெரியவில்லை.

இதுபற்றி எழுதினாலேயே, இளையராஜாவை வசை பாடுகிறாய், தூஷிக்கிறாய், பொல்லாங்கு பேசுகிறாய் என்கிறார்கள். இது எதுவுமே உண்மையல்ல.

அவர் இசையமைத்த சிம்பொனி அங்கீகரிக்கப்பட்டு வெளியிடப்பட்டிருக்கிறதா என்பது மட்டும்தான் என்னுடைய கேள்வி. இதில் பொல்லாங்கு. தூஷணை, வசை எங்கிருந்து வந்தது?


இது ஒரு உண்மைத் தேடல் அவ்வளவே.


இதுபற்றிப் பேசிக்கொண்டிருந்ததைக் கேட்ட என்னுடைய நண்பர் சந்திரசேகர் என்பவர் ஸ்கூட்டரைக் கொண்டுவந்து நிறுத்தி “வாங்க போய் விசாரிச்சிட்டு வந்துருவோம்” என்றார். அவர் ஒரு இளையராஜாவின் ரசிகர்.

“எங்கே பிலடெல்பியாவுக்கா?” என்றேன்.

“அட, அந்த சிம்பொனி வெளிவந்திருக்கா இல்லையா என்பதை நாம் எதற்காக இணையத்தின் மூலம் தெரிந்துகொள்ளவேண்டும்? அதைவிட வேறொரு சுலபமான வழி இருக்கு. அதற்கென்று ஒரு இடம் இருக்கு. அதுதான் சரியான இடம்., அந்த உரிய இடத்தில் போய் விசாரிச்சிருவோம். மியூசிக்வேர்ல்ட், பிளானெட் எம் ஆகிய இடங்களில் போய்க் கேட்டால் தெரிந்துவிடுகிறது. அப்படி அந்த இடங்களில் இவர் இசையமைத்த சிம்பொனி சிடி கிடைத்துவிட்டால் அப்புறம் நீங்கள் இதுபற்றிப் பேசக்கூடாது” என்றார்.

“பேசக்கூடாதா, அப்புறம்தான் நிறையப் பேசவேண்டும். சிம்பொனி இசையமைத்த ஒரு தமிழனின் புகழைப் பாடிக்கொண்டே இருக்கவேண்டும்” என்றேன்.

“ஒரு நான்கைந்து சிடிக்கள் ஒட்டுமொத்தமாக வாங்கிவிடுகிறேன். இந்த சிடியெல்லாம் அறுபது எழுபது ரூபாயெல்லாம் இருக்காது. எப்படியும் நானூறு ஐநூறு ரூபாயாகத்தான் இருக்கும்” என்றபடியே வழியெல்லாம் பேசிக்கொண்டே வந்தார்.

முதலில் இந்திரா நகரிலிருந்த சப்னா புக்ஹவுசுக்குச் சென்றோம். இது மிகப்பெரிய புத்தகக் கடை என்றாலும் மியூசிக்கிற்குத் தனி செக்ஷன் வைத்திருப்பார்கள். அவர்கள் மிகவும் சிரத்தையாகத் தேடிவிட்டு “இல்லை தீர்ந்துவிட்டிருக்கிறதுபோல” என்றார்கள். அங்கிருந்து பிளானெட் எம் கடைக்குச் சென்றோம். அங்கும் அக்கறையாகத் தேடிவிட்டு இல்லை என்றார்கள். நண்பர் மனம் தளரவில்லை. “இவனுங்களுக்கு இதுபோன்ற டேஸ்டெல்லாம் இருக்காது சார். வெறும் சினிமா பாட்டுக்குதான் முக்கியத்துவம் கொடுப்பானுங்க. வாங்க நாம பிரிகேட் ரோடு போயிரலாம்” என்று நேராக பிரிகேட் ரோட்டிற்கு ஸ்கூட்டரை விரட்டினார்.

“முதலில் மியூசிக் வேர்ல்ட் பார்த்துறலாம்” என்று பிரமாண்டமான கடைக்குள் நுழைந்தார். இளையராஜா அடுக்கப்பட்டிருந்த வரிசைக்குச் சென்று தேடிப்பார்த்துக் கிடைக்காமல் டை கட்டியிருந்த இளைஞனைக் கேட்க ‘அட இதானே வேண்டும்’ என்ற பாவனையில் அந்த இளைஞன் மடமடவென்று சென்று ஒரு வரிசையில் உட்கார்ந்து ஆராயத்தொடங்கியதும் பாரத்தீங்களா எப்படி நம்ம செயல்பாடு என்பதுபோன்ற பார்வையை நண்பர் என்மீது வீச ஆரம்பிக்க, ‘சே, நாம்தான் தப்பாக விஷயம் தெரியாமல் இருக்கிறோம். சிடி வந்திருக்கிறது’ என்றுதான் தோன்றிற்று.


அந்த வரிசையைப் பார்த்துக் கலைத்துப்போட்டு, பக்கத்து வரிசைக்கு நகர்ந்து சென்று உட்கார்ந்து “இதுவா பாருங்கள்” என்று அந்த இளைஞன் எடுத்துக்காட்டியது HOW TO NAME IT. “இது இல்லை சிம்பொனி” என்றதும் அவன் மறுபடியும் தேடிவிட்டு “இல்லை சார் Out of stock என்று நினைக்கிறேன்” என்றான். “அந்த சிடி வந்திருக்கிறதா? என்பதைக் கொஞ்சம் செக் செய்யுங்கள்” என்றதும் “ஒன்மினிட் சார்” என்றவன் கம்ப்யூட்டரில் இருந்த லிஸ்டில் எதுஎதையோ தட்டி எங்கெங்கோ மவுசை இழுத்துக்கொண்டுபோய் கிளிக் செய்து ஒரு தடவைக்கு இரண்டு தடவை படித்துப்பார்த்துவிட்டு உதட்டைப் பிதுக்கி “இல்லை சார். அதனை வரவழைக்கவில்லை போலிருக்கிறது” என்று சொல்லி “பேர் என்ன சொன்னீர்கள்?” என்று கேட்டு டயரி ஒன்றில் குறித்துக்கொண்டான்.

அடுத்து போன இடம் பிளானட் எம். அங்கும் இதே கதைதான் நடைபெற்றது. தேடுதேடு என்று தேடினார்கள். கடைசியில் இல்லையென்று கை விரித்தார்கள். நண்பருடைய முகம் இப்போது கொஞ்சம் இறுக்கத்துக்கு வந்திருந்தது. ஆனாலும் அவர் நம்பிக்கையை இழந்தமாதிரி தெரியவில்லை. “சார் மல்லேஸ்வரத்தில் குரு டிரேடர்ஸ் என்று ஒரு கடை இருக்கிறது. அவர்கள் வெறும் தமிழ்நாடு சம்பந்தப்பட்ட சிடிக்களை வைத்திருப்பவர்கள். அங்கே ஒரு நடைபோய் விசாரித்துவிட்டு வந்துவிடுவோமே” என்றார். எனக்கும் ஆசைதான். எங்கேயாவது கிடைத்துவிட்டால் நன்றாகத்தானே இருக்கும். “சரி போவோம்” என்றேன். அங்கும் போனோம். எம்எல்வசந்தகுமாரி, பித்துக்குளி முருகதாஸிலிருந்து பக்தி கர்நாடகம் இசை ஆல்பங்கள் என்று நிறைய வைத்திருந்தார்கள். இந்த ஒரு சிடி மட்டும் அவர்களிடமும் இல்லை.

“இதனை நான் விடுவதாக இல்லை. இந்த சிடி பெங்களூர் வராததற்கு எத்தனையோ காரணங்கள் இருக்கலாம். அடுத்த சனிக்கிழமை நான் சென்னை போகிறேன். அங்கே போய் சல்லடைப் போட்டாவது இந்த சிடியுடன்தான் வருவேன்” என்றார் நண்பர்.

“அப்படியே செய்யுங்கள். எனக்கு ஒரு மூன்றோ நான்கோ வாங்கிவந்துவிடுங்கள்” என்றேன்.

சென்னை சென்ற நண்பர் ஆழ்வார்பேட்டை, மவுண்ட்ரோடு என்று எங்கெங்கோ அலைந்திருக்கிறார். கடைசியில் அங்கும் அவருக்குக் கிடைத்தது ஏமாற்றமே. “அதுமட்டுமில்லை. இந்த சிடி வரவில்லையென்ற விஷயமே அந்தக் கடைக்காரர்களுக்குக்கூடத் தெரியவில்லை என்பதுதான் ஆச்சரியமாக இருக்கிறது. அவர்களே ஒவ்வொரு இடத்திலும் தேடுதேடென்று பல ஷெல்புகள் தேடிவிட்டுத்தான் அப்புறம் இல்லையென்கிறார்கள்” என்று வருத்தப்பட்டார் நண்பர்.

அப்படித்தான் இருக்கிறது. இன்னமும் விளங்கமுடியாத புதிர்களில் ஒன்றாகவே இந்த விஷயத்தைச் சிலபேர் வைத்திருக்கிறார்கள் என்றுதான் தோன்றுகிறது.

இளையராஜாவோ அல்லது அவர் சம்பந்தப்பட்டவர்களோ இந்தப் புதிரை விடுவிக்கவேண்டும். விக்கிலீக்ஸ் மூலம் உலகின் எத்தனையோ ரகசியங்கள் வெளிச்சத்துக்கு வந்துள்ளன. இன்றைய இணையத்தின் வீச்சுக்கு இதுவும் ஒரு அடையாளம். அப்படியிருக்கும்போது இதற்கு மட்டும் ஏன் இத்தனை ரகசியக்காப்பு?

இளையராஜா சிம்பொனி அமைத்தார் என்று சொல்லித்தான் அவருக்குப் பெருமை சூட்டவேண்டும் என்பதில்லை. அவர் பேர் சொல்வதற்கு அவர் இசையமைத்த எத்தனையோ நல்ல பாடல்கள் இருக்கின்றன. விஸ்வநாதனுக்குப் பிறகு வந்த நல்ல இசையமைப்பாளர் அவர். ஒரு பத்து வருடங்களுக்குத் தமிழ்த்திரை இசையுலகை ஆக்கிரமித்திருந்தவர் அவர். அந்தச் சமயத்தில் அவர் தந்த எத்தனையோ நல்ல பாடல்கள் அவர் பெயர் சொல்லும்.
  
இந்த சிம்பொனி விஷயத்தை யாராவது வெளிப்படையாக இணையத்திலாவது விளக்கினார்கள் என்றால் நல்லது.